33.विद्यार्थीप्रिय, शिस्तप्रिय व संवेदनशील शिक्षिका सुजाता घोळवे मॅडम

 

उत्तर सोलापूर तालुक्यातील दहिटणे जिल्हा परिषदेच्या शाळेत कार्यरत असणाऱ्या श्रीमती सुजाता घोळवे यांनी शैक्षणिक क्षेत्रातल्या अनेक वर्षाच्या सेवेनंतर आजही शिकवण्यासोबतच त्यांचं शिकणं सुरू ठेवलं आहे. या शाळेत विज्ञान शिक्षक म्हणून त्यांची नेमणूक झाली. अवघ्या दहा विद्यार्थ्यापासून त्यांनी शाळेचा पट साठ पर्यंत वाढवला.

      मुलींचे शिक्षण, माता पालकांचा शिक्षणातील सहभाग, महिला सक्षमीकरण यासाठी त्यांनी खूप काम केलं. यापूर्वी त्यांनी जिल्हा परिषद शाळा उळे,सिंदखेड, हगलूर, अकोले काटी,तामडाग, येथील जिल्हा परिषदेच्या शाळेत उल्लेखनीय कामगिरी केली. पहिली वर्गासाठी आनंददायी वाचन, लेखन यासारखे विशेष उपक्रम राबविण्यात मॅडमचा हातखंडा होता .घोळवे मॅडम यांचं शिक्षण आजतागायत अखंडपणे सुरूच आहे. डी.एड. नंतर एम.ए.बी.एड, एलएलबी, बी.एस्सी , योगा सर्टिफिकेट कोर्स त्यांनी पूर्ण केला आणि आज त्या इंग्रजी मधून पी.एच.डी.चे शिक्षण घेत आहेत. सर्व संकटांवर मात करत त्यांचं शिकणं सुरूच आहे.शिक्षक हा आयुष्यभर विद्यार्थीच असतो. जो शिकतो, तोच शिकवू शकतो. यावर त्यांचा ठाम विश्वास आहे. घरचा प्रपंच,शाळेतले विविध उपक्रम, प्रशासन हे, शिकण्याची जिद्द असणाऱ्या शिक्षकाला कधीच आडवी येत नाहीत असं त्यांना वाटतं.

        विद्यार्थ्यांच्या शैक्षणिक गुणवत्तेबरोबरच इतर व्यक्तीमत्व विकासासाठी त्या सतत प्रयत्नशील असतात.सांस्कृतिक स्पर्धा, क्रीडा स्पर्धा, जिल्हा स्तरावरील योग स्पर्धा,हस्ताक्षर स्पर्धेत सहभाग घेऊन त्यांनी व त्यांच्या विद्यार्थ्यांनी विशेष प्राविण्य प्रमाणपत्र मिळवले आहे.हिंदी राष्ट्रभाषा स्पर्धा परीक्षा, वर्धा मार्फत घेण्यात आलेल्या परीक्षेत उल्लेखनीय कामगिरी बजावली आहे.इन्सपायर अवॉर्ड चा लाभ विद्यार्थ्यांना मिळवून दिला आहे.स्पर्धा परीक्षेमधून विद्यार्थ्यांमध्ये आत्मविश्वास निर्माण झाला आहे. विद्यार्थ्यांची आणि त्यांची मैत्री इतकी घट्ट जमली आहे की विद्यार्थ्यांना स्वतः आपल्या गाडीमधून दररोज ने आण करतात.पालकांचा विश्वास आणि विद्यार्थ्यांचे यश हीच खरी कमाई आणि पुरस्कार असल्याचे मॅडम सांगतात.केंद्रस्तरीय, तालुकास्तरीय,

जिल्हास्तरीय कार्यशाळेत सुलभक म्हणून त्यांनी उल्लेखनीय कामगिरी बजावली आहे.उत्कृष्ट सुत्रसंचलन, उत्तम वक्ता, उत्तम कवयित्री, गायिका, लेखिका या क्षेत्रात आपला ठसा उमटवला आहे."मुले वाढत असताना", हे पालकांना उपयुक्त व "फ्रेंडशिप विथ लेटर्स "विद्यार्थ्यांना उपयुक्त अशा दोन पुस्तकांचं प्रकाशन केलं आहे.पर्यावरणप्रेमी शिक्षिका म्हणून त्यांची ओळख आहे. हॅपी टू हेल्प फाऊंडेशन तसेच राज्यस्तरीय कविसंमेलन च्या सदस्य म्हणून त्या काम पाहतात.

सीडबाॅल निर्मिती कार्यशाळा,चिमणी घरटे निर्मिती कार्यशाळा,योग विषयक शिबीर यामध्ये त्यांनी विशेष सहभाग नोंदविला आहे.

आजपर्यंत त्यांच्या कार्याची दखल घेऊन शिक्षणविभागातर्फे विशेष शिक्षक पुरस्कार, मनुष्यबळ विकास लोकसेवा अकादमी तर्फे राज्यस्तरीय गुणीजण गुणवंत शिक्षक रत्न पुरस्कार, उत्तर सोलापूर तालुका,प्रा.शिक्षक सहकारी पतसंस्था, मार्डी तर्फे गुणवंत शिक्षक पुरस्कार प्राप्त झाले आहेत.अकोलेकाटी शाळेत घोळवे मॅडम यांनी स्वखर्चातून महिला शिक्षिकांसाठी बाथरूम सुविधा उपलब्ध केली , दहिटणे इथं स्वखर्चातून शालेय रंगरंगोटी,मैदान दुरुस्ती केली, वृक्षारोपण मोहिमेत त्यांनी सहभाग घेतला.

जिल्हास्तरीय क्रीडा स्पर्धेत (शासकीय कर्मचारी स्पर्धा)थाळी फेक स्पर्धेत द्वितीय क्रमांक पटकावला.

इंग्रजी, विज्ञान विषयात विशेष अग्रेसर असणाऱ्या घोळवे मॅडम सहजतेनं, हसतखेळत इंग्रजी वाचायला शिकवतात. इंग्रजी आवडता विषय बनवतात.वैज्ञानिक संकल्पना दैनंदिन जीवनात वापरून सहजतेनं मुलांच्या मनात रुजवतात. सर्व शिक्षक शिक्षकांमध्ये

विद्यार्थीप्रिय, शिस्तप्रिय व संवेदनशील शिक्षिका ही त्यांची वेगळी ओळख आहे.

32.शैक्षणिक क्षेत्रातलं अष्टपैलू व्यक्तिमत्व काटेगावचे रवींद्र देशमुख गुरुजी

 

    नि:स्वार्थ सेवा, लाघवी आणि मृदू भाषा शैली, कला आणि मातृभाषेवरचं प्रेम, शिक्षक, विद्यार्थी ,पालक ,अधिकारी, पदाधिकारी या सर्वांचा समन्वय घडवण्याची अंगी असणारी कला, प्रत्येक विद्यार्थ्याला आपल्याकडं  प्रेमानं खेचून घेणारं अष्टपैलू व्यक्तिमत्व, म्हणजे काटेगावचे रवींद्र देशमुख गुरुजी! सध्या दक्षिण सोलापूर तालुक्यातील बाळगी इथल्या जिल्हा परिषदेच्या शाळेत ते कार्यरत आहेत.

       गुरुजींना नाटक,संगीताची विलक्षण आवड. कौठाळी शाळा आणि गुरुजींचं नातं शब्दांत नाही सांगता येणार.विद्यार्थ्यांच्या अंगभूत कलागुणांना वाव देण्यासाठी अनेक हालअपेष्ठांना तोंड देत सहका-यां च्या मदतीनं केवळ एक वर्षाचा अपवाद वगळता अखंड वार्षिक स्नेहसंमेलन कार्यक्रम, कथा कथन, वक्तृत्व, समूहगायन, लोकनृत्य, बालनाट्य अशा विविध व्यक्तिमत्त्वविकास स्पर्धांमधून शाळेनं  तालुका ,जिल्हा स्तरावरील पारितोषिकं पटकावली. गुरुजीलिखित "गुरूदक्षिणा" या बालनाट्यानं तर जिल्ह्य़ात प्रथम क्रमांक पटकावला. 

     त्यांनी हौशी रंगमंच गाजवलं, कथा कविता बालनाट्य, वृत्तपत्रीय लेखन तसेच नाट्य लेखन ते करत आहेत. त्यांच्या " काटेरी सासर " या नाटकास मराठी रंगभूमी प्रयोग परिनिरीक्षण मंडळ मुंबईकडून प्रमाणित केले आहे.या सर्व कला विद्यार्थ्यांमध्ये रुजविण्यासाठी त्यांनी प्रयत्न केला .त्यांच्या विद्यार्थ्यांचे  लेखन संकलन वृत्तपत्रातून प्रसिद्ध झाले. त्यांच्या विद्यार्थ्यांचा मराठी इंग्रजी सुंदर हस्ताक्षर प्रकल्प संपूर्ण जिल्ह्य़ासाठी मार्गदर्शक ठरला. सर्व मुलांची अक्षरे सुंदर आणि एक सारखी असू शकतात हे त्यांनी दाखवून दिलं.  लोक सहभागातून शाळाविकासाची अनेक भरीव कामं त्यांनी केली आहेत.सोलापूर आकाशवाणीवर शालेय कार्यक्रमाचं प्रसारण करण्यात आलं.

     कवठे ता. उत्तर सोलापूर  या शाळेत असताना तत्कालीन सीईओ साहेब राजेंद्र भारूड सरांच्या  फेसबुक लाईव्ह कार्यक्रमा प्रसंगी विद्यार्थ्यांसह जिल्हा परिषद सोलापूर येथे भारूड साहेबांच्या कार्यालयात उपस्थित राहण्याचा योग आला. विद्यार्थ्यांची गायन कला आणि प्रश्न विचारण्याचं धाडस पाहून गुरुजींचा त्यांनी गौरव केला. या शाळेत लोकवर्गणीतून सुमारे साडेतीन लाख रुपये जमवून ग्रामस्थांच्या मदतीनं कवठे शाळा आय.एस.ओ. मानांकन प्राप्त झाली. 

     गुरुजींची बदली बाळगी.ता दक्षिण सोलापूर इथं झाली. गाव संपूर्ण कन्नड भाषिक, विद्यार्थ्यांवर कन्नड भाषेचा प्रभाव व गुरुजीना कन्नड बोलता येत नाही व कळतही नाही अशी आव्हानात्मक स्थिती होती. पण शिक्षण मराठीतून असल्यानं त्यांनी मराठीचा वापर आग्रहपूर्वक केला.  अशाही परिस्थितीत अविरत प्रयत्न करत गुणवत्ता वाढीचा प्रयत्न करत शिष्यवृत्ती परिक्षेस बहुसंख्य मुलांना बसवले.

   गुरुजी समर्पित भावनेनं सर्व अधिकारी वर्ग, मुख्याध्यापक व सहकारी शिक्षकासोबत सेवा कार्य  करत आहेत .

        गुणवंत शिक्षक, प्रेरणा पुरस्कार, जिजाऊ सावित्री पुरस्कार, अक्षरग्रंथ पुरस्कार,आदर्श शिक्षक पुरस्कार,गाव, तालुका,जिल्हा पातळीवरचे अनेक पुरस्कार मिळाले. कथाकथन, वक्तृत्व, नृत्य, लेखना बद्दलही अनेक पुरस्कार मिळाले  प्रत्येक पुरस्कार विद्यार्थ्याना अर्पण करित आपली सेवा अत्यंत नम्रपणे सुरु ठेवली.

त्यांनी अनेक प्रशिक्षण वर्गासाठी तज्ज्ञ मार्गदर्शक म्हणून प्रभावीपणे काम केले.तसेच सोलापूर जिल्ह्यातील जिल्हा परिषदेच्या विविध शाळेतील मुला-मुलींना मुंबई दर्शन सहल ,तसेच  कर्नाटक राज्यात सुद्धा   शिक्षणाधिकारी मा. कादर शेख साहेब व उपशिक्षणाधिकारी मल्हारी बनसोडे साहेब यांच्या मार्गदर्शनाखाली मोठ्या जबाबदारीनं त्यांनी सहल यशस्वी केली.

      गुरुजींनी फेसबुकच्या माध्यमातून " देशमुख गुरुजींचा धडा " हे सदर दिसामाजी काहितरी लिहावे या उक्तीप्रमाणं सलग 365 दिवस दररोज तीन साडेतीनशे शब्दांचं विविध विषयांवर लेखन करुन मराठी साहित्यात एक वेगळा विक्रम स्थापित केला. त्यांचे देशमुख गुरुजींचा धडा भाग :1 आणि वक्ता महाराष्ट्राचा ही दोन पुस्तकेही प्रकाशित झाली आहेत. 

     

31.समाजातील प्रत्येक घटकापर्यंत शिक्षण पोहोचवणारे सुरवसे गुरुजी

 कोणतंही शिक्षण केवळ शाळा आणि विद्यार्थी एवढ्या पुरतच मर्यादित न राहता आपण राष्ट्राचा आणि समाजाचा एक घटक आहोत हे समजून घेत ते समाजातील प्रत्येक घटकापर्यंत पोहोचवण्याचं काम काही शिक्षक करत असतात.

      आयुष मंत्रालय भारत सरकार यांची योगशिक्षक लेवल पाच ही परीक्षा उत्तीर्ण , आर्ट ऑफ लिव्हिंगचे उत्तम प्रशिक्षक, चेस इन स्कूलच्या माध्यमातून जिल्हा परिषद शाळांमध्ये मुलांना बुद्धिबळाचे धडे देत स्वतः बुद्धिबळ खेळाडू व राज्य पंच असणारे, मुलांना करिअर मार्गदर्शन  मायक्रोसॉफ्टकडून इनोव्हेटिव्ह एज्युकेटर एक्स्पर्ट आदी पुरस्कार मिळवणारे असेच एक शिक्षक  परमेश्वर सुरवसे हे माढा तालुक्यातील  जिल्हा परिषद प्राथमिक शाळा सोलंकरवाडी येथे कार्यरत आहेत.

     कोरोना काळामध्ये मुलांना ऑनलाइन शिक्षण, पारावरची शाळा इत्यादी उपक्रम तसेच गावात शैक्षणिक वातावरण निर्मितीसाठी सामाजिक संस्था, ग्रामपंचायत व आपल्या शिक्षक सहकार्याच्या सहाय्यानं  सोलंकरवाडी हे गाव ‘अभ्यासाचं गाव  ‘ म्हणून पुढं आणलं.  मुलांना आधुनिक तंत्रज्ञानाद्वारे शिकता यावं यासाठी रोटरी क्लब, विक्रमसिंह शिंदे बहुउद्देशीय संस्था यांच्या सहकार्यानं मुलांसाठी टॅबलेट स्कूल सुरू केली. मोडनिंब शाळेत असताना लोकवर्गणीतून व पालकांच्या सहाय्यानं शाळेस एक अँड्रॉइड टीव्ही व  15 मुलांना स्वतःचे टॅब्लेट घेण्यास प्रवृत्त केलं.  स्पर्धा परीक्षांच्या मार्गदर्शनातून विद्यार्थ्यांना शिष्यवृत्ती परीक्षा व नवोदय परीक्षेसाठी पात्र बनविले शिष्यवृत्ती मार्गदर्शनपर ‘गुरुकिल्ली’ हे पुस्तक देखील त्यांनी लिहिले आहे.

     टाटा ट्रस्ट व ब्रिटिश काउन्सिल यांचे  समन्वयक म्हणून त्यांनी अरण, मोडनिंब व लऊळ केंद्रातील पंचाहत्तर शिक्षकांना सलग तीन वर्षे इंग्रजीचे अध्ययन व अध्यापन सुधारण्यासाठी मार्गदर्शन केलं.

 याशिवाय मतदान जागृती फेरी, अर

ण, पंढरपूर, मोडनिंब येथे स्वच्छता दिंडी, बाल आनंदबाजार, विद्यार्थी बचत बॅंक,शालेय वस्तू भांडार, ‘लेक वाचवा लेक वाढवा अभियान’ कब पथक,  पालक प्रगती पुस्तक , पहिलीपासून सेमी इंग्रजी वर्ग, विद्यार्थी व्यक्तिमत्व विकास स्पर्धा, टॅलेंट हंट स्पर्धा, रक्तदान शिबिर इत्यादी उपक्रमात सक्रिय सहभाग. न्यूज इन एज्युकेशन या अंतर्गत मुलांना सकाळचे एनआई हे पाक्षिक वाचण्यास उपलब्ध करून दिले. 

आर्ट ऑफ लिव्हिंगचे योग प्रशिक्षक म्हणून त्यांनी विवीध  गावांमध्ये जाऊन सुदर्शनक्रिया, योगासने, प्राणायाम व ध्यानाच्या माध्यमातून तणावमुक्त आनंदी जीवन जगण्याचे धडे दिले आहेत.

20 जणांना योग शिक्षक बनण्यासाठी मार्गदर्शन केल्यानं ते योग शिक्षक म्हणून सेवा करीत आहेत. सोलंकरवाडी येथे दैनंदिन योग वर्ग भरविला जातो. तर मोडनिंब  येथे साप्ताहिक सुदर्शन क्रिया मोफत घेतली जाते.

 आंतरराष्ट्रीय योग दिनाच्या निमित्ताने तालुक्यातील 1000 शिक्षकांना योगविषयी मार्गदर्शन केले आहे. मुलांसाठी  सूर्यनमस्कार स्पर्धा, फिट इंडिया अंतर्गत तीन गावामध्ये सायकल रॅली काढून योग व आरोग्याविषयी जनजागृती केली . सातारा जिल्ह्यातील ‘सुदृढ रविवार’ या उपक्रमांतर्गत कोरोना कालावधीत मुलांना ऑनलाइन योग प्राणायाम व ध्यान शिकविले. तसेच रायगड जिल्ह्यातील मुलांनाही बालचेतना शिबिराद्वारे ऑनलाइन मार्गदर्शन केले आहे. तणावमुक्त शिक्षण, आपल्या मुलांना ओळखा, युवक नेतृत्व प्रशिक्षण, स्वास्थ्य शिबीर, आनंद अनुभूती शिबीर इत्यादि शिबिरांद्वारे नियमित मार्गदर्शन लोकांना करत आहेत. 

    चेस इन स्कूल व  तनिष्का चेस अकादमीच्या माध्यमातून ग्रामीण व शहरी भागातील मुलांना बुद्धिबळ शिकवण्याचं कामही सातत्यानं ते करीत आहेत. 

      आज पर्यंत त्यांना मिळालेले पुरस्कार                  तालुका आदर्श शिक्षक पुरस्कार पंचायत समिती कुर्डूवाडी, महात्मा फुले गुणवंत शिक्षक पुरस्कार ,लोकमंगल शिक्षक रत्न पुरस्कार, रोटरी क्लब आणि आयुर्वेद व्यासपीठाचा योग सेवा पुरस्कार. विविध पुरस्काराने त्यांना गौरविण्यात आले आहे.

30.कविता हिंगमिरे च्या चतु:सूत्रीने खंडाळी शाळेचा लौकिक

 शाळेतील सर्व शिक्षकांची शाळेबद्दल असणारी एकीची भावना , पालकांनी दिलेला मदतीचा प्रतिसाद, विद्यार्थ्यांमध्ये निर्माण झालेली शाळेविषयीची आवड , आणि आनंददायी पद्धतीनं सुरू असलेली गुणवत्तापूर्ण आणि दर्जेदार शिक्षणाकडची वाटचाल ही माळशिरस तालुक्यातील जिल्हा परिषद प्राथमिक शाळा खंडाळी इथली शिक्षणाची चतु:सूत्री. विविध शैक्षणिक उपक्रमाच्या विश्वासावर, सहकारी शिक्षकांच्या मदतीनं शाळेचा पट 79 वरून 152 पर्यंत नेणाऱ्या इथल्या कविता धन्यकुमार हिंगमिरे मॅडम.

         शिक्षणसेवक म्हणून जि प शाळा चाहूरवस्ती ता.माळशिरस इथं त्यांच्या सेवेची सुरुवात झाली. जनसंपर्क वाढवून त्यांनी चौथीपर्यंतची शाळा सातवी पर्यंत नेली.पुढं कोरोना काळात जि प शाळा खंडाळी इथं चारही महिला शिक्षिकांनी शाळा आतून बाहेरून रंगवून चित्र, सुविचार, घोषवाक्य लिहून बोलक्या भिंती तयार केल्या .

 सुरुवातीचे सलग दहा वर्षे त्यांच्या सातवी स्कॉलरशिपचा निकाल शंभर टक्के असायचा. आजही शासकीय आणि खाजगी विविध संस्थांमार्फत घेण्यात येणाऱ्या विविध स्पर्धात्मक परीक्षेमध्ये त्यांच्या विद्यार्थ्यांनी यश मिळवले आहे. विविध शैक्षणिक, सहशालेय , व सामाजिक उपक्रमाद्वारे त्या नवनवीन शैक्षणिक प्रयोग करतात. अध्ययन अध्यापनामध्ये आधुनिक तंत्रज्ञानाचा वापर करत त्यांमध्ये नाविन्यता आणण्याचा प्रयत्न त्या करतात.शैक्षणिक व्हिडिओ निर्मिती करत त्यांचे स्वतःचे यूट्यूब चैनल देखील आहे. 

       विविध सामाजिक विषयांवर तसेच विविध सण व उत्सवाच्या निमित्तानं त्यांचे अनेक शैक्षणिक लेख व सांस्कृतिक लेख विविध वर्तमानपत्रांमधून, शैक्षणिक मासिकांमधून तसेच जीवन शिक्षणअंकामध्येही प्रसिद्ध झालेले आहेत. त्यांच्या शब्दांची गोष्ट या उपक्रमाची बालभारतीच्या शिक्षण गाथा या विभागानं दखल घेतली आहे. मैत्री करू वाचनाशी या नवोपक्रमासाठी सर फाउंडेशनचा सर फाउंडेशन एज्युकेशनल इनोव्हेशन नॅशनल अवॉर्ड 2024 साठी त्यांची निवड झाली आहे.

        त्यांनी वर्ग स्तरावर कार्य करताना वेळोवेळी विद्यार्थ्यांना स्वखर्चातून शैक्षणिक साहित्य उपलब्ध करून दिले आहे.विद्यार्थ्यांमध्ये ई लर्निंग ची गोडी वाढवली आहे. मी इंग्रजी वाचणारच,मैत्री करू वाचनाशी, शब्दांची गोष्ट, प्लास्टिक मुक्त गाव हे उपक्रम यशस्वीरीत्या सुरू आहेत. जलशक्ती अभियान, माझी वसुंधरा अभियान, घरघर तिरंगा अभियान, तंबाखू मुक्त शाळा अभियान, जागर योजनांचा अभियान, जिल्हा पाणी व स्वच्छता मिशन कक्ष सक्रिय सहभाग ,लेट्स चेंज मध्ये स्वच्छता मॉनिटर म्हणून सक्रिय सहभाग, तालुक्यातील संपूर्ण विद्यार्थ्यांसाठी ऑनलाईन अध्यापनाची कार्यशाळा या मध्येही त्यांचा सक्रिय सहभाग आहे. त्यासाठी संवेदनशील शिक्षक या पुरस्कारानं त्यांना सन्मानित करण्यात आलं आहे. आर्ट ऑफ लिविंग कडून विद्यार्थ्यांसाठी बाल चेतना शिबिराचं आयोजन केलं , विद्यार्थ्यांना योगा, ध्यान प्राणायाम चे महत्त्व पटवून दिलं. प्रत्येक शनिवार हा गोष्टीचा शनिवार, आनंददायी शनिवार , मोबाईल स्मार्ट टीव्ही, संगणक, प्रोजेक्टर इत्यादी द्वारे अभ्यासक्रमातील संकल्पना स्पष्ट केल्या जातात.राज्यस्तरीय शिक्षक ध्येय डिजिटल साप्ताहिक मध्ये त्यांचे लेख प्रसिद्ध झाले असून संपादकीय मंडळामध्येही कविता मॅडम कार्यरत आहेत.

          त्यांच्या या शैक्षणिक कार्याबद्दल त्यांना आजपर्यंत विविध पुरस्कार मिळाले आहेत. राज्य प्राथमिक शिक्षक संघ यांचा सन्मान कर्तृत्वाचा सन्मान ,तंत्रस्नेहींचा संवेदनशील शिक्षक पुरस्कार , ओन्ली समाजसेवा बहुउद्देशीय संस्था बार्शी जिल्हास्तरीय आदर्श शिक्षक पुरस्कार,अग्निपंख शैक्षणिक समूह महाराष्ट्र राज्यस्तरीय नवोपक्रमशील शिक्षक पुरस्कार , शिक्षक संघ शाखा माळशिरसचा संवेदनशील शिक्षिका पुरस्कार , पोलीस जाणीव सेवा संघ महाराष्ट्र राज्यस्तरीय कार्य गौरव पुरस्कार,पंचायत समिती माळशिरस तालुकास्तरीय आदर्श शिक्षक पुरस्कार अशा विविध पुरस्काराने त्यांना सन्मानित करण्यात आलं आहे.

29.प्रतिभा नवले यांनी दिली गुणवत्तापूर्ण शिक्षणाबरोबरच संस्काराची जोड.......

 

       वाडी वस्तीवरील शाळेमध्ये दर्जेदार शिक्षण मिळेल का? याबाबत पालकांच्या मनामध्ये असणारी साशंकता दूर करत, शाळेविषयी त्यांच्यामध्ये निर्माण केलेली आपलेपणाची भावना! विविध स्पर्धा परीक्षेतील विद्यार्थ्यांची चमकदार कामगिरी! त्यातून विद्यार्थ्यांना निर्माण झालेली शाळेविषयीची आवड!आणि तदनंतर सुरू झालेली गुणवत्ता पूर्ण आणि संस्कारक्षम शिक्षणाकडं वाटचाल! 'आजी -आजोबा' हा उपक्रम राज्याला माहिती करून देणाऱ्या माढा तालुक्यातील जिल्हा परिषद प्राथमिक शाळा केदार वस्ती (उ. खु.) येथील शिक्षिका प्रतिभा सुभाष नवले .   

         रायगड जिल्ह्यातील सुधागड (पाली- बल्लाळेश्वर )येथून २००३ मध्ये शिक्षणसेवक म्हणून शिक्षण सेवेची त्यांची सुरुवात. बदली नंतर माढा नंबर १ आणि केदार वस्ती उपळाई खुर्द इथं आधुनिक काळाची गरज ओळखून त्यांनी सर्वप्रथम सेमी वर्गाची सुरुवात केली. त्यामुळं शाळेच्या पटसंख्येत लक्षणीय वाढ झाली. विविध स्पर्धा परीक्षा मंथन, टॅलेंट हंट, एटीएस ,आयटीएस, एमटीएस या सारख्या स्पर्धा परीक्षेला विद्यार्थी बसवून त्यांना राज्यस्तर गुणवत्ताधारक बनवले. चित्रकला स्पर्धा, कला साहित्य निर्मिती याची आवड असल्यानं नेहमी उत्कृष्ट शैक्षणिक साहित्य निर्मिती,पोस्टर्स स्पर्धा, महिला दिनाच्या निमित्तानं अनेक वेळा त्या मार्गदर्शन करतात, आय एस ओ शाळा ,शाळासिद्धि 'अ' दर्जाची शाळा , लोकसहभाग याकरिता सक्रिय सहभाग .

           लोकसहभागातून इमारत दुरुस्ती, रंगरंगोटी, डिजिटल शाळा, मैदान सपाटीकरण इत्यादी कामं केली. एकही विद्यार्थी अप्रगत राहणार नाही यासाठी विविध उपक्रम त्या आयोजित करतात. समृद्ध परिपाठ, दररोज सामान्य ज्ञान व त्यावर आधारित- स्पर्धा परीक्षा, सुंदर हस्ताक्षर उपक्रम, मी इंग्रजी वाचणार, प्लास्टिक मुक्त शाळा, करूया स्मरण लेखन, गोष्ट चार शब्दांची, प्रसंगानुरूप वक्तृत्व स्पर्धा, चित्रकला स्पर्धा, आजचा दिनांक आजचा पाढा, डोळ्यांचे व्यायाम प्रकार, गोष्टींचा शनिवार, उपवास मोबाईलचा, तंबाखू मुक्त शाळा , केंद्रस्तरीय संमेलनात विविध शैक्षणिक विषयावर वेळोवेळी मार्गदर्शन, जागर योजनांचा, सेल्फी विथ सक्सेस, मी आणि माझे आजी -आजोबा हे उपक्रम यशस्वीरित्या राबवत आहेत. 

             विविध सामाजिक व शैक्षणिक विषयावर त्यांचे लेखन वर्तमानपत्रातून,तसेच शैक्षणिक मासिकातून प्रसिद्ध झालेले आहेत. त्यांच्या उपक्रमाची सर फाउंडेशन एज्युकेशनल इनोवेशन नॅशनल अवॉर्ड 2023 साठी निवड झाली आहे.

         तत्कालीन मुख्यकार्यकारी अधिकारी मा. दिलीप स्वामी साहेब यांच्या संकल्पनेतील संस्कारक्षम विद्यार्थी घडविण्याकरता राबविलेला 'दशसूत्री उपक्रम'- अंतर्गत उत्कृष्ट कार्य त्यांनी केले आहे. त्यांनी त्यांच्या शाळेमध्ये राबविलेला 'आजी -आजोबा' उपक्रम याची जिल्हास्तरावर प्रसिद्धी होऊन ,राज्य शासनाने या विषयावर स्वतंत्र परिपत्रक निर्गमित करून महाराष्ट्रभर 'आजी- आजोबा दिन' हा उपक्रम साजरा करण्याविषयी मार्गदर्शनपर सूचना दिल्या. सर्वांगीण गुणवत्तापूर्ण , संस्कारक्षम , आरोग्यसंपन्न विद्यार्थी घडविणं हा ध्यास मनाशी बाळगून त्या कार्यरत आहेत.

त्यांच्या या शैक्षणिक कार्याबद्दल त्यांना

विविध पुरस्कारांनी सन्मानित करण्यात आलं आहे.

जिल्हा परिषद सोलापूर आदर्श शिक्षक पुरस्कार 

तालुकास्तरीय आदर्श शिक्षक पुरस्कार पंचायत समिती कुर्डूवाडी

सर फाउंडेशन एज्युकेशनल इनोवेशन नॅशनल अवॉर्ड

मनोहर भाऊ डोंगरे शिक्षक पतसंस्था मोहोळ यांचेकडून जिल्हास्तरीय 'कर्तव्यदक्ष शिक्षक पुरस्कार'

छत्रपती परिवार मरवडे यांचे कडून जिल्हास्तरीय 'कृतीनिष्ठ शिक्षक' पुरस्कार

रोटरी क्लब माढा यांचेकडून 'नेशन बिल्डर अवॉर्ड' या सारख्या विविध पुरस्कारांचा समावेश आहे.