व्हाट्सअप ,फेसबुक आणि इतर सोशल मीडियाच्या माध्यमातून संपूर्ण राज्यातील शिक्षकांना 'आयडियाची कल्पना' या नावानं परिचित असणाऱ्या आणि विद्यार्थ्यांना छोट्या मोठ्या उपक्रमातून आनंददायी आणि मनोरंजनात्मक पद्धतीनं शिक्षण देत त्यांच्यामध्ये अमुलाग्र बदल घडवणाऱ्या जिल्हा परिषद प्राथमिक शाळा अरण येथील एक उपक्रमशील विद्यार्थी प्रिय शिक्षिका कल्पना घाडगे.गेले तेवीस वर्षे माढा तालुक्यातील विविध प्राथमिक शाळांमधून शिक्षण क्षेत्रात त्या नवनवीन प्रयोग करीत आहेत.
अरण ही आयएसओ मानांकन प्राप्त असून जिल्ह्यातील एक नावाजलेली शाळा आहे. ज्या शाळेला बरडावरची शाळा म्हटलं जायचं ती शाळा आज हरित शाळा म्हणून ओळखली जाते.इथल्या प्रत्येक गोष्टीवर, वस्तूवर, झाडावर त्या मनापासून प्रेम करतात. ओसाड माळरानावर असणाऱ्या शाळेचे रूपांतर हरित शाळेत करण्यात, शाळेचा पट वाढविण्यात, शाळेच्या सौंदर्यामध्ये भर घालण्यात, शैक्षणिक उठावातून शाळेची भौतिक सुविधा पूर्ण करण्यात त्यांचा मोलाचा वाटा आहे.
अरण मधील शिक्षण प्रेमी ग्रामस्थांनी सुमारे साडेतीन लाख रुपयांची कायम ठेव ठेवून आजी माजी विद्यार्थी कल्याणकारी विकास संस्था स्थापन केली. त्या संस्थेच्या सचिव म्हणून त्या काम पाहतात. शाळेच्या शतक महोत्सवानिमित्त शाळेतील माजी विद्यार्थ्यांच्या मदतीनं शाळेमधील सहकारी शिक्षकांच्या मदतीनं किलबिल बालोद्यान निर्माण केलं आहे.
कोरोना काळात त्यांच्याकडं आलेल्या पहिलीच्या वर्गाची पहिलीची किलबिल खूपच गाजली. या काळात त्यांनी फक्त अरण मधीलच नाहीत तर इतर भागातील विद्यार्थ्यांनाही ऑनलाईन मार्गदर्शन केलं यामुळं त्या सर्वदूर परिचित झाल्या. त्यांनी स्वतःचं यूट्यूब चैनल सुरू केलं. या चॅनलच्या माध्यमातूनही अनेक विद्यार्थ्यांना मार्गदर्शन केलं. ऑनलाईन टेस्ट लेक्चर, संडे ऍक्टिव्हिटी, गुगल मॅप मीटिंग, टेस्ट, अशा अनेक उपक्रमाच्या माध्यमातून विद्यार्थ्यांना शिक्षणाचा छंद लावण्यात घडागे यशस्वी झाल्या.
सह्याद्री महिला बचत गटाच्या माध्यमातून अनेक स्त्रियांना लघुउद्योगासाठी त्यांनी प्रवृत्त केलं आहे. मिशन ग्रीन अरण अंतर्गत त्यांनी आपल्या सहकाऱ्यांच्या मदतीनं वृक्षांची लागवड केली.
विद्यार्थ्यांमध्ये पर्यावरण विषयी जाणीव जागृती होण्यासाठी जलदिन, वनदिन, चिमणी दिवस, वसुंधरा दिन, पर्यावरण दिन असे अनेक दिन साजरे करून त्याबद्दल विद्यार्थ्यांना माहिती देऊन पर्यावरण विषयक जागरूकता निर्माण करण्याचा प्रयत्न त्या करतात.
मुली व महिलांना रांगोळीचे प्रशिक्षण त्यांनी दिलं आहे. वृत्तपत्र लेखन त्यांनी केले आहे.
पत्रलेखन, शैक्षणिक सहली, वनभोजन, परिसर भेट, व्यावसायिकांच्या मुलाखती, किशोरी मेळावा, कार्यानुभव अंतर्गत विविध वस्तू तयार करणं, पाढे पाठांतर स्पर्धा स्वनिर्मित शैक्षणिक साहित्य, रजेच्या काळात पालकांचं विद्यार्थ्यांना मार्गदर्शन, आठवडी बाजार, विविध दिन साजरे करणं, लोकशाही पद्धतीनं वर्ग स्तर मंत्रिमंडळांचं प्रात्यक्षिक निवडणूक, वर्ग स्तरावर व शाळा स्तरावर विविध स्पर्धा असे अनेक मुलांच्या हाताला काम व मेंदूला चालना देणारे उपक्रम त्या राबवतात. त्यांच्याकडे असलेल्या वर्गाची प्रश्नपेढी त्या स्वतः तयार करतात. बरेचसे साहित्य हे स्वनिर्मित, विद्यार्थ्यांच्या मदतीनं व पालकांच्या सहकार्यानं तयार केलेलं असतं. त्यांचे आजपर्यंत अनेक विद्यार्थी शिष्यवृत्ती परीक्षेत यशस्वी झाले आहेत. शाळेच्या मुख्याध्यापिका शांता वाघमोडे आणि शाळेतील इतर सर्व सहशिक्षक यांच्या मदतीनं शाळेत शिष्यवृत्तीचे जादा तास त्या घेतात.
जिल्हा परिषद सोलापूरचा आदर्श शिक्षक पुरस्कार त्यांना प्रदान करण्यात आला.
त्यांना प्रवासाची व वाचनाची आवड आहे. प्रवासानंतर पाहिलेल्या ठिकाणांचे प्रवास वर्णन त्या अतिशय चपखल आणि सुंदर शब्दात मांडतात. तसेच त्यांनी स्वतःचे वाचनालय तयार केले आहे.अनेक पुस्तकांचे वाचन त्यांनी केलेले आहे. वाचलेल्या पुस्तकावर त्यांचे 'वाचता वाचताआवडलेलं' हे सदर ते व्हाट्सअप च्या अनेक ग्रुप वर शेअर करतात. त्यांची विद्यार्थिनी आदिती चव्हाण हिचा आदीप्रभा काव्यसंग्रह ही प्रकाशित झाला आहे.
