39.ननवरे गुरुजींचा विज्ञान आणि इंग्रजी विषयात लौकिक

लहानपणापासून कुस्तीची आवड जोपासणारे मच्छिंद्र ननवरे गुरुजी हे आखाड्यात उतरून मुलांना कुस्तीचं प्रशिक्षण देण्याचं स्वप्न पहात होते. मात्र ते शक्य न झाल्यानं कबड्डीमध्ये क्रीडा शिक्षक म्हणून त्यांनी आपला चांगला ठसा उमटविला. स्वतः जुदो- कराटेचं प्रशिक्षण घेऊन ते मुलांना शिकवीत आहेत. त्यांचे विद्यार्थी योगासनामध्ये पारंगत आहेत. सध्या माळशिरस तालुक्यातील तिरवंडी येथील जिल्हा परिषदेचे शाळेत ते विज्ञान विषयाचे शिक्षक म्हणून काम पाहतात. विज्ञान आणि इंग्रजी विषयाचे उत्तम शिक्षक म्हणून माळशिरस तालुक्यात त्यांचा नावलौकिक आहे. माळशिरस तालुक्यातील शिक्षकांना इंग्रजी विषयाचं प्रशिक्षण देण्याचं काम ते करतात. तुपे वस्ती या शाळेत शिक्षकी पेशाची सुरुवात केल्यानंतर मेडद व येळीव या शाळांमध्ये त्यांनी सेवा केली.

        तुपे वस्ती शाळेत पैगंबर तांबोळी या शिक्षकांच्या सोबतीने सोलापूर जिल्हा परिषदेच्या शंकराव मोहिते पाटील गुणवत्ता विकास कार्यक्रमात. महाराष्ट्र शासनाच्या सर्वांगीण शैक्षणिक गुणवत्ता विकास कार्यक्रमात दोन वेळा शाळेला जिल्ह्यात प्रथम क्रमांक मिळवून दिला. तसेच ग्रामीण गुणवत्ता विकास कार्यक्रमातही शाळेनं तालुक्यात प्रथम क्रमांक मिळवला. गेल्यावर्षी मुख्यमंत्री स्वच्छ शाळा सुंदर शाळा स्पर्धेत त्यांच्या सध्याच्या तिरवंडी शाळेना तालुक्यात तृतीय क्रमांक मिळविला. जिल्हा परिषदेच्या व्यक्तिमत्व विकास स्पर्धेत त्यांच्या विद्यार्थ्यांनी जिल्हास्तरावर यश मिळविले. स्पर्धा परीक्षांचा मुलांचा पाया पक्का व्हावा याकरिता पहिलीच्या वर्गापासूनच ते मुलांची तयारी करून घेतात. मुलांमध्ये अंधश्रद्धा निर्मूलनाचं कार्यही ते करतात. मुलांचा हस्ताक्षर सुंदर असावं यासाठी ते जाणीवपूर्वक प्रयत्न करतात. आत्तापर्यंतच्या सर्व शाळांमध्ये चांगले वृक्षारोपण व्हावे यासाठी उपक्रम राबवले. तुपे वस्ती शाळेतील कठीण खडकावर वृक्षारोपण करताना माती उपलब्ध नसल्यानं त्यांनी राबविलेल्या एक मुलगा एक ढेकूळ या उपक्रमाचं शाळेला भेट देणाऱ्या शिक्षण उपसंचालक शिक्षणाधिकारी यांनी खूप कौतुक केलं.

      विद्यार्थ्यांच्या सर्वांगीण विकासासाठी ते सतत प्रयत्न करतात. कोरोनाच्या दुसऱ्या लाटेत माळशिरस तालुक्यातील चाकोरे या गावातील परिस्थिती अतिशय बिकट होती. गावातील अनेक व्यक्तींचा मृत्यू झालेला होता. अनेक जण कोरोना पॉझिटिव्ह होते. पूर्ण चाकोरे गाव मानसिक दबावात होतं. अशा काळात जि प शाळेतील शिक्षक ननवरे यांनी स्वतःच्या जीवाला धोका पत्करून रुग्णांच्या सेवेसाठी वाहून घेण्याचं ठरवलं. सरांचे अनेक वर्गमित्र अकलूज मधील नामांकित डॉक्टर आहेत या संबंधाचा फायदा चाकोरेच्या रुग्णांना करून देण्यासाठी त्यांनी प्रयत्न सुरू केला. कोरोना पॉझिटिव्ह रुग्णांच्या जवळ कोणत्याही नातेवाईकांची जाण्याची हिंमत होत नसताना ते रुग्णाजवळ जाऊन त्यांना मानसिक आधार देत होते. त्यांची वाणी गोड असल्यानं रुग्णांवर त्याचा सकारात्मक प्रभाव पडत होता. डॉक्टर मित्रांच्या सहकार्यानं त्यांनी समुपदेशन करण्याचं काम सुरू केलं होतं. जवळपास 14 रुग्णांना त्यांनी मृत्यूच्या दाढेतून बाहेर काढलं. कोरोना नंतर ही त्यांचं सामाजिक कार्य सुरूच आहे.

      ननवरे गुरुजी 2008 पासून सेमी इंग्रजी माध्यमातून मुलांना शिकवितात. त्यामुळं ते ज्या शाळेत कार्यरत असतात त्या शाळेची पटसंख्या वाढते. मच्छिंद्र ननवरे गुरुजींना विविध पुरस्कारांनी सन्मानित करण्यात आलं आहे. माळशिरस पंचायत समितीचा आदर्श शिक्षक पुरस्कार, नवोपक्रमासाठी गुजरातच्या रेडिओ पालनपुर आणि ऋचारी इनोवेशन यांचा पुरस्कार, माने पतसंस्थेचा आचार्य दोंदे पुरस्कार, पत्रकार संघाचा राज्यस्तरीय पुरस्कार अशा विविध पुरस्कारांनी त्यांना गौरविण्यात आलं आहे.