ई लर्निंग आणि प्रिसिजन

              

        प्रगत शैक्षणिक महाराष्ट्र या

कार्यक्रमाला राज्यामध्ये 2015 पासून सुरुवात झाली. या शासन निर्णयास शिक्षणाची  सनद असं म्हटलं जातं. या शासन निर्णयांतर्गत महाराष्ट्र राज्यातील शाळा आय.एस.ओ.करणं, माहिती तंत्रज्ञान साधनांसह शाळा डिजिटल करणं , शाळांच्या भौतिक सुविधा वाढवून शाळेचा विकास करणं आणि प्रत्येक मुल शिकतं  ही संकल्पना घेऊन महाराष्ट्र राज्यातील प्रत्येक शाळेतील प्रत्येक मुल प्रगत करण्यासाठी शिक्षक, प्रशासन, पालक, स्वयंसेवी संस्था, लोकप्रतिनिधी स्थानिक स्वराज्य संस्था, सहकारी संस्था आणि  वेगवेगळ्या औद्योगिक कंपन्या पुढे आल्या. त्यांच्या सी. एस. आर. फंडाच्या माध्यमातून शाळा विकास निधी उभा करण्याचं काम  आपल्या सोलापूर जिल्ह्यासह संपूर्ण राज्यात  खूप मोठ्या प्रमाणात सुरू झालं. 

           संपूर्ण जगात नावाजलेल्या आणि जवळ जवळ ऐंशी टक्के चार चाकी गाड्यांना कॅमशाफ्ट पुरविणाऱ्या प्रिसिजन कंपनीने प्रिसिजन फाउंडेशनच्या माध्यमातून आपला सर्व सी एस आर फंड शिक्षण प्रक्रियेकडे वळविला. सोलापूर जिल्ह्यातील जिल्हा परिषदेच्या शाळेमध्ये कोणत्या ई-लर्निंग साहित्याची गरज आहे. ते कोणत्या शाळेत, कोणत्या उपक्रमशील शिक्षकांना सामावून घेऊन  त्यांच्यासोबत काम करावं, याचा अभ्यास सुरू झाला.राज्यामध्ये शैक्षणिक क्षेत्रात काम करणाऱ्या सर फाउंडेशन या संस्थेने प्रिसिजन फाउंडेशनला  या कामी मोलाची मदत केली. शिक्षणातील नव विचार प्रवाह, जागतिक स्तरावरील डिजिटल 

शिक्षणाचं महत्त्व ओळखून  प्रिसिजन उद्योग समूहाचे उद्योगपती डॉ. यतीन शहा , प्रिसिजन फाऊंडेशनच्या अध्यक्षा डॉ.सुहासिनी शहा मॅडम ,  संपर्क प्रमुख  माधवजी देशपांडे,  त्यांची सर्व टीम,यांनी सर फाऊंडेशनचे सिद्धाराम माशाळे, बाळासाहेब वाघ, हेमा शिंदे प्राध्यापक बेत सर यांना सोबत घेऊन जिल्ह्यातील जिल्हा परिषदेच्या शाळेमध्ये ई लर्निंग शिक्षण देण्यासाठीचा एक आराखडा तयार केला. दीडशे शाळांची निवड केली. प्रत्येक शाळेमध्ये स्मार्ट बोर्ड, लॅपटॉप, प्रत्येक इयत्तेचा अभ्यासक्रम, विज गेल्यानंतर शिक्षण बंद पडू नये म्हणून सोलर सिस्टिमची सोय केली. 

जिल्ह्यातील व  इतर जिल्ह्यांमध्येही डिजिटल शिक्षणाची साधने पुरविली गेली.

     आज सोलापूर जिल्ह्यातील शाळांमध्ये डिजिटल अंतर्गत ई-लर्निंग शिक्षण प्रभावीपणे चालू आहे. ज्या शाळांना  डिजिटल साहित्य मोफत दिलेले आहे या शाळेतील सर्व शिक्षकांना याचे  प्रशिक्षण देऊन त्यांना सजग केल्यामुळे आणि त्याचा वेळोवेळी आढावा घेतल्यामुळे लॉकडाऊनच्या काळातही सोलापूर जिल्ह्यासह व इतर जिल्ह्यातील काही शाळांमध्ये ई-लर्निंग अध्ययन- अध्यापनाचे काम काही अंशी का होईना पण सुरू  आहे.

      ई लर्निंग शिक्षणाचा आयडॉल म्हणून आपण ज्यांच्याकडे पाहतो अशा संगणक तज्ञ संदीप गुंड यांच्या मार्फत  शिक्षकांना ई-लर्निंग अध्यापन

 पद्धतीचं प्रशिक्षण देण्याचं महत्त्वाचं काम या संस्थेमार्फत करण्यात आलं. शाळा व्यवस्थापन समितीचे सदस्य, सर्व पालक वर्ग, विद्यार्थ्यांपर्यंत 

ई लर्निंग शिक्षणाचं  महत्व पटत गेलं. शेवटी ई लर्निंग शिक्षण हे अंतिम साध्य नसून  शिक्षणातील न समजणार्‍या क्लिष्ट संकल्पना, विद्यार्थ्यांच्या स्पष्ट होण्यासाठी अध्यापन आनंददायी आणि नाविन्यपूर्ण होण्यासाठी हे एक प्रभावी साधन आहे. त्यामुळे शिक्षकांनी या ई लर्निंग अध्यापन पद्धतीचं मनापासून स्वागत केलं.

             यावर्षी मात्र कोरोना या साथीच्या रोगामुळे शिक्षण व्यवस्थेसह संपूर्ण जगावर संकट कोसळलं शाळा बंद झाल्या आणि डिजिटल शिक्षण सुरू झालं. काहीच न होण्यापेक्षा विद्यार्थी ,शिक्षक, पालक या शिक्षण प्रक्रिया सोबत राहायला हवेत. यासाठी ऑनलाइन अध्यापन वर्ग सुरू झाले. आजच्या या ऑनलाईन शिक्षणासाठीचं श्रेय  काही अंशी या प्रिसिजन फाऊंडेशन आणि सर फाउंडेशन सोलापूर यांना द्यायलाच हवं.