35.रझिया इस्माईल जमादार.....

 शिक्षणाचा नवीन विचार प्रवाह ,डॉक्टर, इंजिनीयर, आयटी याच क्षेत्राची विद्यार्थ्यांची असलेली पहिली पसंती, यामुळं आपली मुलं बालवाडी अंगणवाडी पासूनच इंग्रजी शाळेत शिकलीच पाहिजेत असा असलेला पालकांचा अट्टाहास यामुळं गावोगावी जिल्हा परिषद आणि नगरपालिकेच्या शाळांकडं  सर्वांचाच बघण्याचा दृष्टिकोन बदललेला असतानाच जिल्ह्यातील असंख्य उपक्रमशील आणि विद्यार्थ्यांसाठी रात्रंदिवस झटणाऱ्या शिक्षकांमुळं   या शाळा आजही खाजगी आणि इंग्रजी शाळांसोबत स्पर्धेत टिकून आहेत.

      अक्कलकोट तालुक्यातील     न.प.प्रा.मराठी मुलींची शाळा नंबर१ येथील

रझिया इस्माईल जमादार या नगरपालिकेच्या शाळांमध्ये त्यांच्या नवनवीन  उपक्रमांमुळं सर्वांना परिचित आहेत. वाचन ,लेखन ,चित्रकला ,गाणी ऐकणं, कविता लेखन, वेगवेगळे सर्जनशील शैक्षणिक उपक्रम, शैक्षणिक साहित्य निर्मिती अशा अनेक गोष्टींचा त्यांना छंद आहे.

दै.संचार,दै.सकाळ,दै.तरूणभारत,दै.दिव्यमराठी,दै.अक्कलकोट समर्थ इ.वर्तमानपत्रां मधून कविता,वाचकांचा पत्रव्यवहार,साद -प्रतिसाद, चारोळ्या,उखाणे, चित्र काव्य लेखन,सखीसाठी लेखन,दै.सकाळ 'सप्तरंग' पुरवणीमध्ये लेखन केले आहे . त्यांचे 'प्राणी आपले मित्र ' हे बालकाव्य प्रसिद्ध आहे.

 वाचन विकासासाठी विविध कृतींची,उपक्रमांची यशस्वी अंमलबजावणी त्यांनी केली.सकाळ एन आय ई व एमटेक इंजिनिअर्स आयोजित  "शालेय  शिक्षकांनी असा साधला संवाद " या राज्यस्तरीय लेखन स्पर्धेत त्यांनी प्रथम पारितोषिक मिळवलं.

 छात्र प्रबोधन,ज्ञानप्रबोधिनी पुणे यांच्या प्रबोधन दूत योजनेत त्यांचा  सहभाग आहे. विविध स्पर्धेत भाग घेऊन त्यांनी वाचनालयासाठी पुस्तके मिळवली आहेत.

स्वच्छ भारत सुंदर भारत अभियानांतर्गत  वक्तृत्व,निबंध ,प्रकटवाचन ,चित्रकला,गीत गायन सामूहिक तथा वैयक्तिक ,नृत्य, पथनाट्य, नाट्यीकरण यासारख्या विविध उपक्रमात भाग घेऊन विद्यार्थ्यांना यश मिळवून दिले. नगरपरिषदेच्या वतीने आयोजित केलेल्या प्रत्येक स्पर्धेमधे विद्यार्थ्यांना पारितोषिके मिळालीआहेत. वर्तमानपत्रांतून विद्यार्थ्यांना चित्रकलेतून मूल्यसंवर्धन या उपक्रमांतर्गत स्वत: चित्रे काढण्यास प्रेरित केले.आजतागायत त्यांच्या विद्यार्थ्यांची दोनशे चित्रे आणि विद्यार्थी लिखित विनोद विविध वर्तमानपत्रांमध्ये छापून आले आहेत. वाचन कोपरा,वर्गग्रंथालय ,शाळाग्रंथालय ,श्री.शहाजी वाचनालय येथे दररोज एक तास वाचनासाठी,अभिवाचन स्पर्धा, प्रकटवाचन स्पर्धा ऑनलाईन बडबडगीत स्पर्धा, यामध्ये त्यांचा मोठा सहभाग असतो. 

 नागपूर आकाशवाणी वर शाळाबाहेरची शाळा  कार्यक्रमांतर्गत  १ते१० संख्यांची ताबडतोब बेरीज यासाठी त्यांचा विद्यार्थी योगेश बन्ने याची आकाशवाणी वर १५ मिनिटांची  यशस्वी मुलाखत झाली. विद्यार्थी सर्वच क्षेत्रात पारंगत व्हायला हवा हा त्यांचा अट्टाहास असतो. लेखक कृषीभूषण विश्वासराव कचरे,चित्रकार,लेखक,शिक्षक मयूर दंतकाळे सर यांच्याशी  विद्यार्थ्यांची पत्रमैत्री, रेडिओ पुणेरी आवाज,मुली रंगल्या काव्यात ,काव्य तुमचे तरंग आमचे यामध्ये त्यांच्या विद्यार्थिनींचे स्वलिखित कवितांचे सादरीकरण RJ माधवी पवार यांनी केले आहे.बालकुमार दिवाळी अंक, कोल्हापूर यामध्ये त्यांच्या विद्यार्थ्यांच्या कविता व चित्रे प्रसिद्ध आहेत. त्यांच्या स्वतःच्या आणि विद्यार्थ्यांच्या कविता आणि विविध लेखन कौशल्य पाहून तत्कालीन मुख्यकार्यकारी अधिकारी दिलीप स्वामी व मुंबई महापौर किशोरीताई पेडणेकर यांच्याहस्ते सन्मानपत्र,सन्मानचिन्ह व शालेय साहित्य देऊन त्यांना सन्मानित केले आहे.

अशा या गुणी, साहित्यावर प्रेम करणाऱ्या आणि विद्यार्थ्यांना करायला लावणाऱ्या शिक्षिकांचा  आजपर्यंत विविध पुरस्कारानं सन्मानित करण्यात आलं आहे. त्यामध्ये गुणवत्तापूर्ण शिक्षणासाठी गुणवंत शिक्षक पुरस्कार,सर फाऊंडेशन,स्टेट इन्नोवेटीव प्राईज, राज्यस्तरीय प्रयोगशील शिक्षक पुरस्कार सन ,पंचायत समिती अक्कलकोट, आदर्श शिक्षक पुरस्कार.लायन्स क्लब अक्कलकोट आदर्श शिक्षक पुरस्कार सन ,

न.प.शिक्षण मंडळ अक्कलकोट, आदर्श शिक्षक पुरस्कार ,सावित्रीबाई फुले गुणवंत शिक्षिका पुरस्कार ,विश्वभान प्रतिष्ठान मुंबई ऑनलाईन राज्यस्तरीय आदर्श शिक्षक पुरस्कार ,९ वा राष्ट्रीय अक्कलकोट भूषण आदर्श शिक्षक पुरस्कार यांचा समावेश आहे.